1. grein
Félagið heitir Fjallið, félag jarðvísinda-, land- og ferðamálafræðinema við Háskóla Íslands.
Merki þess er:
Heimili þess er Askja, Náttúrufræðihús Háskóla Íslands við Sturlugötu 7, 101 Reykjavík.
2. grein
Félagar eru öll þau sem stunda nám í Háskóla Íslands og greiða félagsgjöld hverju sinni. Stjórn Fjallsins ákveður upphæð félagsgjalda í upphafi hvers skólaárs.
3. grein
Lög Fjallsins skulu vera á heimasíðu þess.
4. grein
Markmið félagsins eru:
- Að vinna að hverskonar hagsmunamálum félagsfólks
- Að efla samskipti félagsfólks
- Að standa fyrir fræðslu- og skemmtanastarfsemi
5. grein
Stjórn Fjallsins skipa:
- Forseti:
Er andlit félagsins og ábyrgðarmaður. Forseti skal gegna embætti fundarstjóra á stjórnarfundum. Forsetinn sér um samskipti við önnur nemendafélög, deildir og önnur embætti innan Háskóla Íslands. Forseti er sjálfskipaður inni í NáttVerk sem er hagsmunafélag Verkfræði- og náttúruvísindasviðs.
- Varaforseti:
Varaforseti gegnir starfi ritara á stjórnarfundum og sér um að skrá helstu atriði stjórnarfunda og aðrar bréfaskriftir fyrir hönd Fjallsins. Varaforsetinn sér um póstfang Fjallsins, fjallid@hi.is, auk þess að gegna hlutverki formanns í fjarveru forseta. Varaforseti sér um að varðveita fundargerðir stjórna og setja í möppu fyrir framtíðarstjórnir.
- Gjaldkeri:
Sér um öll fjármál félagsins og undirfélög, gerð fjárhagsáætlun, bókhald, innkaup, útgjöld, umsóknir styrkja og annað sem viðkemur fjármálum félagsins. Gjaldkeri verður að hafa náð 20 ára aldri.
- Skemmtanastjóri:
Sér um að skipuleggja vísindaferðir ásamt því að skipuleggja bjórkvöld, haustferð, árshátíð, Öskjuleikana og aðrar skemmtanir í samráði við aðra stjórnarmeðlimi. Skemmtanastjóri getur búið til nefndir og klúbba innan Fjallsins.
- Kynningarstjóri:
Sér um að kynna viðburði á vegum Fjallsins á bæði íslensku og ensku. Hlutverk kynningarstjóra er að setja inn tilkynningar og fréttir á síður félagsins sem og tilkynningartöflu um þá viðburði sem eru á vegum Fjallsins ásamt því að senda markpóst á meðlimi félagsins. Kynningarfulltrúi sér einnig um að ljósmyndir séu teknar á þeim viðburðum er Fjallið stendur fyrir og gera þær aðgengilegar.
- Fulltrúar 1. árs nema og skiptinema:
Valdir af stjórn Fjallsins í byrjun hvers skólaárs. Þau verða að vera á fyrsta ári í jarðvísindum, land- eða ferðamálafræði. Æskilegt er að fá einn fulltrúa úr hvorri deild. Einnig er valinn fulltrúi erlendra skiptinema. Þau eru tengiliðir fyrsta árs nemenda og skiptinema við stjórn Fjallsins. Hlutverk fyrsta árs nemenda og skiptinema er að veita nýnemum og erlendum nemum tengingu við stjórn. Þau hafa ekki atkvæðisrétt á stjórnarfundum en hafa tillögurétt.
- Fjallageitin:
Er viðburðastjóri Fjallasnigilsins sem er gönguklúbbur innan Fjallsins. Fjallageitin sér um að skipuleggja gönguferðir, fjallgöngur, hellaferðir og aðra viðburði úti við á vegum Fjallasnigils og Fjallsins í samráði við aðra stjórnarmeðlimi. Fjallageitin situr stjórnarfundi ef þurfa þykir en hefur ekki kosningarétt.
- Viðauki við störf stjórnar:
Framkvæmdarstjórn Fjallsins skipa: Forseti, Varaforseti, Gjaldkeri, Kynningarstjóri og Skemmtanastjóri. Þetta eru þau störf sem embættin gegna formlega. Annað sem viðkemur störfum Fjallsins skal unnið í sameiningu.
- Vantraust:
Ef meðlimir stjórnar telja einhvern meðlim stjórnarinnar ekki gegna embætti sínu sem skyldi er hægt að lýsa vantrausti á þann aðila. Kosið skal um hvort viðkomandi eigi að gegna embætti áfram. Ef meirihluti stjórnar er sammála skal sá og hinn sami segja af sér. Auglýsa skal embættið, ef fleiri en einn bjóða sig fram, skal boða félagsfund þar sem haldnar eru kosningar, annars getur stjórn Fjallsins skipað í embættið ef enginn sækist eftir því.
6. grein
Stjórn Fjallsins skal tryggja að einn nemandi úr hvorri deild gegni starfi hagsmunafulltrúa og sitji á námsbrautar-, deildarráðs- og deildarfundum Jarðvísindadeildar og Líf- og umhverfisvísindadeildar.
Störf hagsmunafulltrúanna tveggja og sæti þeirra á námsbrautar-, deildarráðs- og deildarfundum Jarðvísindadeildar eða Líf- og umhverfisvísindadeildar skulu skipuð samkvæmt eftirfarandi forgangsröð:
- Forseti
- Varaforseti
- Gjaldkeri / Kynningarstjóri / Skemmtanastjóri
- Nýnemafulltrúar / Fjallageitin
- Aðrir nemendur sem stjórn velur úr viðkomandi deildum
Einnig skal reynt að tryggja að einn nemandi úr hvorri deild sitji á fundum með sviðsráði.
7. grein
Rétt til boðunar stjórnarfunda hafa:
- Forseti
- Varaforseti
- Þrír eða fleiri fulltrúar í stjórn
8. grein
Stjórn félagsins skal halda almenna félagsfundi ef þörf krefur. Stjórn félagsins er heimilt að skipa nefndir og/eða einstaka starfsmenn til að vinna að ákveðnum málefnum í lengri eða skemmri tíma. Hér er vísað sérstaklega til haustferðar eða árshátíðar. Heimilt er að fela slíkum nefndum eða starfshópum að boða til og sjá um félagsfundi.
9. grein
- Aðalfund skal halda árlega eigi síðar en 2 vikum fyrir próf. Til hans skal boða með að minnsta kosti viku fyrirvara. Rétt til fundarsetu hafa allir nemendur í jarðvísindum, landfræði og ferðamálafræði við Háskóla Íslands en kosningarétt hefur einungis félagsfólk Fjallsins.
- Dagskrá aðalfundar skal vera eftirfarandi:
1. Fundarstjóri kosinn
2. Skýrsla fráfarandi stjórnar
3. Ársuppgjör gjaldkera
4. Lagabreytingar
5. Kosningar
6. Önnur mál
- Lagabreytingar skulu kynntar með þriggja daga fyrirvara. Hlutfall atkvæða ræður á aðalfundi en ⅔ samþykktra atkvæða þarf til lagabreytinga. Atkvæðagreiðsla fer fram með handauppréttingu.
- Kosningar:
Allt félagsfólk hefur rétt til að bjóða sig fram til stjórnarstarfa. Kosið skal til framkvæmdastjórnar og embættis Fjallasnigils og þarf meira en ½ samþykktra atkvæða til að hljóta kjör. Atkvæðagreiðsla skal fara fram leynilega. Komi til jafnteflis í kosningum skal endurtelja öll gild atkvæði. Haldi jafnteflið áfram, skal haldin ný kosning milli þeirra frambjóðenda sem flest atkvæði hlutu. Verði enn jafntefli eftir aðra kosningu skal niðurstaðan ráðin með hlutkesti. Sé aðeins einn frambjóðandi í embætti þarf sá að hljóta stuðning a.m.k. ⅓ atkvæðisbærra viðstaddra til að ná kjöri.
10. grein
Fráfarandi stjórn skal halda fund með verðandi stjórn, kynna helstu starfsemi og vera til aðstoðar sé þess þörf. Ný stjórn skal taka þátt í störfum fráfarandi stjórnar eftir aðalfund og taka við formlega 1. júní.
11. grein
Ákvæði um störf og völd stjórnar. Bera þarf allar ákvarðanir undir alla meðlimi framkvæmdarstjórnar Fjallsins. Hver stjórnarmeðlimur í framkvæmdarstjórn hefur sinn atkvæðisrétt og skal meirihluti atkvæða ráða. Falli atkvæði jafnt með og á móti skal atkvæði formanns gilda tvöfalt.
12. grein
Fjallið nemendafélag skal alltaf hafa jafnréttissjónarmið að leiðarljósi og bera höfuðið hátt. Fjallið skal vera til fyrirmyndar í umhverfismálum.
13. grein
Fjallið nemendafélag ber alltaf að stefna á sigur í hverju sem þau taka sér fyrir hendur því í Fjallinu eru ekki taparar.
14. grein
Lög Fjallsins skulu ávallt vera kölluð Jarðlög Fjallsins.
15. grein
Lukkudýr Fjallsins er Snilli Fjallasnigill. Snilli skal vera viðstaddur á stórum viðburðum Fjallsins. Stjórn Fjallsins sér um að hán sé vel með farinn og að hán sé afhentur nýrri stjórn við stjórnarskipti.